बेलायतको सबैभन्दा धनी परिवारका चार सदस्यलाई घरेलु कामदारको शोषण गरेको अभियोगमा स्विट्जरल्यान्डको अदालतले जेल सजाय सुनाएको छ । जेनेभामा रहेको आफ्नो भिल्लामा काम गर्न भारतबाट लगेका कामदारलाई शोषण गरेको अभियोगमा अदालतले प्रकाश र कमल हिन्दुजासहित उनीहरूका छोरा अजय र बुहारी नम्रतालाई शोषण र गैरकानुनी ढङ्गले नोकरचाकर राखेको आरोपमा दोषी ठहर गरेको बीबीसीले जनाएको छ ।

उनीहरूलाई चारदेखि साढे चार वर्षको सजाय तोकिएको छ । मानव तस्करीको गम्भीर आरोपबाट भने उनीहरूले छुटकारा पाएका छन् । भारतबाट लगिएका तीन जना कामदारले हिन्दुजा परिवारले दैनिक १८ घण्टासम्म काम लगाएर सात पाउन्ड मात्र भुक्तान गरेको आरोप लगाएका थिए ।

स्वीस कानुनानुसार १८ घण्टा अवधिका लागि कम्तीमा ७० पाउन्ड भुक्तानी गर्नुपर्थ्याे । उनीहरूले आफ्नो राहदानी जफत गरेको पनि आरोप लगाएका छन् । हिन्दुजा परिवारले ४७ बिलियन डलरभन्दा धेरैको कारोबार गर्दै आएको छ । भारतबाट गएका उनीहरुले निर्माण, कपडा, अटोमोबाइल, आयल, बैंकिङ र फाइनान्ससम्बन्धी कम्पनी सञ्चालन गर्दै आएका छन् ।