काठमाडौं – काठमाडौंस्थित भारतीय राजदूतावासमा आज भारतको ७८ औं स्वतन्त्रता दिवस भव्य समारोहका साथ मनाइएको छ।

समारोहको सुरुआत भारतीय राजदूत महामहिमले भारतको राष्ट्रिय झण्डा झण्डोत्तोलन गर्दै गरे। यसपछि, भारतका माननीय राष्ट्रपति श्रीमती द्रौपदी मुर्मुको राष्ट्रको नाममा गरिएको सम्बोधन भिडियोमार्फत प्रस्तुत गरियो। राष्ट्रपति महोदयको सन्देशमा विगत ७७ वर्षमा भारतले विभिन्न क्षेत्रहरुमा गरेको प्रगतिको वर्णन गरिएको थियो र स्वतन्त्रता सेनानीहरुलाई श्रद्धाञ्जली अर्पण गरिएको थियो।

उत्सवको अवसरमा राजदूतले भारतीय सशस्त्र बलका मृतक गोर्खा सैनिकका श्रीमती र निकटतम नातेदारहरुलाई नेरु. ५.५० करोड र कम्बल वितरण गरेर सम्मान जनाउनुभएको छ। साथै, भारतीय सशस्त्र बलका मृतक सैनिकका श्रीमती र १०७ मृतक सदस्यका नातेदारहरुलाई नेरु १२.५५ करोड भुक्तानी गरिएको छ। यस भुक्तानीमा आर्मी ग्रुप इन्स्योरेन्स (एजीआई) कार्यक्रम अन्तर्गत डेथ–इन–सर्भिस, एक्सटेन्डेड इन्स्योरेन्स र एजीआई परिपक्वता भुक्तानीका लाभहरु समावेश छन्।

दूतावासले नेपालका पाँच प्रदेशका २१ शैक्षिक संस्था र पुस्तकालयका लागि पुस्तक अनुदानको पनि घोषणा गरेको छ। यस पहलले दुर्गम क्षेत्रका विद्यार्थीहरुका लागि शैक्षिक सामग्रीको पहुँच बढाउने लक्ष्य राखेको छ।

कार्यक्रममा दूतावासका अधिकारी र उनीहरूको परिवारसँगै नेपालमा रहनुभएका भारतीय समुदायका सदस्य र भारतका मित्रहरूले समेत सहभागिता जनाए। दूतावासको स्वामी विवेकानन्द साँस्कृतिक केन्द्र र केन्द्रीय विद्यालय, काठमाडौंका शिक्षक र विद्यार्थीहरूले देशभक्ति गीत र नृत्य प्रस्तुत गरेका थिए।

यो कार्यक्रम दूतावासको सोसल मिडिया ह्यान्डलहरुमा प्रत्यक्ष प्रसारण गरिएको थियो।