पोखरा – भारतीय राजदूतावास, काठमाडाैंको आयोजनामा पोखराको रमणीय फेवा तालको किनारमा आज कथक नृत्य कार्यक्रम भव्य रूपमा सम्पन्न भएको छ। भारतीय सांस्कृतिक सम्बन्ध परिषद् (ICCR)को सहयोगमा प्रस्तुत गरिएको यो कार्यक्रम आठ सदस्यीय कथक नृत्य टोलीद्वारा प्रदर्शन गरिएको थियो।

उक्त कार्यक्रमको उद्घाटन पोखरा महानगरपालिकाका मेयर श्री धनराज आचार्यले गर्नुभएको थियो। कार्यक्रममा प्रदेशका सांसदहरू र वरिष्ठ सरकारी अधिकारीहरूको उपस्थिति रहेको थियो।

कार्यक्रमलाई सम्बोधन गर्दै मेयर आचार्यले भारत र नेपालबीच लामो समयदेखि रहेको सभ्यतागत र सांस्कृतिक सम्बन्धलाई विशेष रूपमा स्मरण गर्दै यसले दुवै राष्ट्रका जनतालाई एकताबद्ध गराउन महत्त्वपूर्ण भूमिका खेलेको बताउनुभयो।

कथक नृत्य प्रदर्शनले दर्शकहरूको मन जित्न सफल भयो। कार्यक्रममा सबै क्षेत्र र पृष्ठभूमिका व्यक्तिहरूको उल्लेख्य सहभागिता रहेको थियो।

यो कार्यक्रमले भारत र नेपालको साझा सांस्कृतिक सम्पदालाई प्रवर्द्धन गर्नुका साथै दुई देशबीचको जनस्तरीय सम्बन्धलाई थप सुदृढ बनाउने प्रयासलाई बलियो बनाएको छ।