धादिङ, फागुन २५ – धादिङ जिल्लाको खनियाबास गाउँपालिकास्थित कुरी स्वास्थ्य चौकी–वर्थिङ्ग सेन्टर भवन निर्माणको शिलान्यास आज एक विशेष समारोहका बीच सम्पन्न भएको छ। संविधान सभा सदस्य माननीय श्री दिलमान पाख्रिन, खनियाबास गाउँपालिकाका अध्यक्ष श्री रणबहादुर तामाङ तथा काठमाडौँस्थित भारतीय राजदूतावासका काउन्सिलर सुश्री गीताञ्जली ब्रान्डनले संयुक्त रूपमा शिलान्यास गर्नुभएको हो ।

भारत सरकारको आर्थिक सहयोगमा ‘नेपाल–भारत विकास सहकार्य’ अन्तर्गत नेरु. २.५१ करोड लागतमा उक्त भवन निर्माण गरिँदैछ। शिलान्यास कार्यक्रममा राजनीतिक प्रतिनिधिहरू, सरकारी अधिकारीहरू र सामाजिक कार्यकर्ताहरूको उल्लेखनीय उपस्थिति रहेको थियो ।

भारत सरकारको अनुदानमा निर्माण हुन लागेको उक्त परियोजना उच्च प्रभाव सामुदायिक विकास परियोजना (एचआइसीडीपी) अन्तर्गत पर्छ । परियोजना अन्तर्गत स्वास्थ्य चौकी–वर्थिङ्ग सेन्टरको साथै पाले घर, प्राङ्गण पर्खाल, चमेनागृह, बाटो तथा अन्य आवश्यक सुविधाहरू निर्माण गरिनेछ ।

कार्यक्रममा सम्बोधन गर्दै संविधान सभाका माननीय सदस्य, खनियाबास गाउँपालिकाका अध्यक्ष तथा अन्य वक्ताहरूले नेपालका जनताको उत्थानमा भारत सरकारले गर्दै आएको विकास सहयोगको प्रशंसा गरे। साथै, यो स्वास्थ्य चौकी–वर्थिङ्ग सेन्टरको निर्माणले स्थानीय बासिन्दाहरूलाई सहज र गुणस्तरीय स्वास्थ्य सेवा उपलब्ध गराउने अपेक्षा व्यक्त गरिएको छ।

सन् २००३ यता भारत सरकारले नेपालका विभिन्न क्षेत्रमा ५६३ भन्दा बढी उच्च प्रभाव सामुदायिक विकास परियोजनाहरू अघि बढाइसकेको छ, जसमा ४९० वटा परियोजना पूर्णरूपमा सम्पन्न भइसकेका छन् । बागमती प्रदेशमा मात्रै १०८ वटा परियोजनाहरू संचालनमा छन्। साथै, भारत सरकारले नेपालका विभिन्न अस्पताल, स्वास्थ्य चौकी तथा शैक्षिक संस्थाहरूलाई १००९ वटा एम्बुलेन्स र ३०० वटा स्कुल बस उपहारस्वरूप प्रदान गरिसकेको छ। यसै क्रममा धादिङ जिल्लाका विभिन्न संस्थाहरूले १५ वटा एम्बुलेन्स तथा ३ वटा स्कुल बस प्राप्त गरिसकेका छन् ।

भारत र नेपालबीचको घनिष्ठ सम्बन्धलाई प्रतिबिम्बित गर्ने यस परियोजनाले नेपाली जनताको उत्थानमा महत्त्वपूर्ण भूमिका खेल्ने विश्वास गरिएको छ । उच्च प्रभाव सामुदायिक विकास परियोजनाहरूको कार्यान्वयनले नेपाल सरकारले प्राथमिकता दिएका पूर्वाधार विकासका प्रयासहरूमा भारत सरकारको निरन्तर सहयोग रहने जनाइएको छ ।