काठमाडौँ । राप्रपाका उपाध्यक्ष विक्रम पाण्डे पार्टीबाट टिकट लिएर चितवन पुगिसकेका छन् । तर, चितवन पुगेसँगै उनले आफूले चितवन–३ बाट उम्मेदवारी नदिने भन्दै कार्यकर्तामार्फत सन्देश प्रवाह गरिरहेका छन् ।

राप्रपा चितवनका युवा नेता सुलभ सिग्देलले टिकट पाए पनि उम्मेदवारी दिने नदिने निश्चित भइनसकेको बताए । उनका अनुसार अहिले पार्टीकै महानगर कमिटी अध्यक्ष दीपक थापा मगरलाई अघि सार्ने कि भन्नेमा पाण्डे छलफलमा छन् ।

स्रोतका अनुसार अध्यक्ष राजेन्द्र लिङ्देनले आफ्नो निर्वाचन क्षेत्रमात्रै हेरेको र अन्य नेताहरूको हकमा पनि कुनै चासो नदेखाएपछि उनी असन्तुष्ट बनेका हुन् । ‘मैले मात्रै जित्नुपर्छ अरूले जेसुकै गरुन् भन्नेजस्तो सोच अध्यक्षमा देखियो’, एक नेताले पाण्डेको भनाइ उद्धृत गर्दै भने, ‘आफूचाहिँ एमालेसँग तालमेल पनि पर्ने अरूको हकमा चाहिँ केही नगर्ने भन्ने हुन्छ ?’

लिङ्देनमा आफूबाहेक अरू कोही पनि नेताले जित्न हुँदैन भन्नेजस्तो प्रवृत्ति हाबी भएको पाण्डेले निकटस्थसँग बताएका छन् ।

राप्रपाका महामन्त्री भुवन पाठकले सोमबार नै पाण्डेको टिकट जारी भइसकेको बताए । उनले अहिलेसम्म चितवन–३ मा नयाँ टिकट जारी नगरिएको बताए ।

चितवन–३ मा नेकपाबाट रेनु दाहाल र रास्वपाबाट सोबिता गौतम उम्मेदवार छन् । सो क्षेत्रबाट यसअघि भने पाण्डेले नै जितेका थिए ।