७ मंसिर २०८१, शुक्रबार
७ मंसिर २०८१, शुक्रबार
११ भाद्र २०८०, सोमबार ०२:१५
भक्तपुरको मध्यपुरथिमि नगरपालिका–२ सानोठिमीको बाल सुधार गृहमा रहेका एक युवकको ज्यान गएको घटनामा मृतकका परिवारसँग सहमति भएको छ ।
गएको तीन गते ज्यान गएको घटनामा जिल्ला प्रशासन कार्यालय भक्तपुरमा सहमति भएको हो ।
रामेछापको मन्थली नगरपालिका–३, कठजोरका १८ वर्षीय कमल बस्नेतको ज्वरोले थलिएको अवस्थामा समयमै उपचार नपाउँदा भदौ ३ गते बिहान ज्यान गएपछि मृतकका आफन्त र परिवारले क्षतिपूर्तिको माग गर्दै शव उठाएका थिएनन् ।
घटना लगत्तै मृतकका आफन्तले बाल सुधार गृह अगाडि नाराबाजी गरी तोडफोड गरेपछि तनावग्रस्त भएको थियो ।
भदौ ४ गते दुई सय २१ जना बन्दी फरार भएका थिए ।
शवको परीक्षण गरी आवश्यक प्रकृया पुरा गर्ने सहमति भएको भक्तपुरमा प्रमुख जिल्ला अधिकारी खगेन्द्रप्रसाद रिजालले जानकारी दिनुभयो ।
मृतक परिवारले १० लाख क्षतिपूर्ति एवम् राहत रकमको माग गर्दै आएका थिए ।
सहमति भएसँगै मृतक बस्नेतको आज शिक्षण अस्पताल महाराजगञ्जमा शव परीक्षण गर्ने र दाहसंस्कार हुने भएको छ ।
त्यसैगरी बाल सुधार गृहमा रहेका ५७ जनालाई कारागार विभागले उपत्यका बाहिरका सुधार गृहमा स्थानान्तरण गरेको छ ।
सानोठिमीको सुधार गृहबाट १८ जनालाई पर्सा, १८ जनालाई मकवानपुर, सात जनालाई डोटी र १४ जनालाई रुपन्देहीको सुधार गृहमा स्थानान्तरण गरेको विभागले जानकारी दिएको छ ।
सुधार गृहमा रहेका दुई सय ९७ मध्ये ४३ बालिका र किशोरी छन् ।
भदौ ४ गते सुधार गृह तोडेर फरार रहेकामध्ये ६ जनाबाहेक अरूलाई २४ घण्टाभित्रै प्रहरीले पक्राउ गरेको थियो ।
फरार ६ जनाको खोजी भइरहेको प्रहरीले जनाएको छ ।
