न्युजिल्यान्ड र बङ्लादेशबीचको तेस्रो तथा अन्तिम एकदिवसीय खेल आज हुँदैछ । यो खेल मिरपुरमा नेपाली समय अनुसार दिउँसो पौने २ बजे शुरु हुनेछ । तीन खेलको शृङ्खलामा पाहुना टोली न्युजिल्यान्डले १–० को अग्रता बनाएको छ ।

दोस्रो खेल न्युजिल्यान्डले ८६ रनले जितेको थियो भने पहिलो खेल वर्षाका कारण रद्द भएको थियो । आजको खेल जितेमा न्युजिल्यान्डले शृङ्खला जित्नेछ भने हारेमा शृङ्खला एक/एकको बराबरी हुनेछ । तीन खेलको एकदिवसीय शृङ्खला खेल्न न्युजिल्यान्ड बङ्लादेश भ्रमणमा गएको हो ।

यस्तै, इङ्ल्यान्ड र आयरल्यान्डबीचको तेस्रो तथा अन्तिम एकदिवसीय खेल आज हुँदैछ । यो खेल बेलुका सवा ५ बजे शुरु हुनेछ । तीन खेलको शृङ्खलामा इङ्ल्यान्डले १–० को अग्रता बनाएको छ । पहिलो खेल वर्षाले रद्द भएको थियो भने दोस्रो खेल इङ्ल्यान्डले ४८ रनले जितेको थियो ।

आजको खेल जितेमा इङ्ल्यान्डले शृङ्खला जित्नेछ भने पराजित भएमा एक/एकको बराबरी हुनेछ ।