विराटनगर । कोसीका प्रदेश प्रमुख परशुराम खापुङले दुई दिन समय दिएर नयाँ सरकार गठनको आह्वान गरेका छन् ।

मुख्यमन्त्री केदार कार्कीले प्रदेशसभामा विश्वासको मत नलिएकाले उनी पदमुक्त भएको निष्कर्ष निकाल्दै प्रदेश प्रमुख खापुङले संविधानको धारा १६८ (५) अनुसार प्रदेशसभामा विश्वासको  मत प्राप्त गर्न सक्ने प्रदेशसभा सदस्यलाई वैशाख २८ गते अपरान्ह ५ बजेभित्र मुखयमन्त्रीमा दाबी पेश गर्न आह्वान गरेका हुन् ।

कोसीमा मुख्यमन्त्री केदार कार्की पदमुक्त हुने वा नहुने विषयमा सत्तारुढ र प्रतिपक्षबीच विवाद रहेका बेला प्रदेश प्रमुख खापुङले मुख्यमन्त्रीले साझेदार दलले समर्थन फिर्ता लिएपछि ३० दिनभित्र विश्वासको मत नलिएकाले सरकार रिक्तताको अवस्था देखाउँदै नयाँ सरकार गठनको आह्वान गरेका हुन् ।

२६ चैतमा नेकपा एमाले र नेकपा माओवादी केन्द्रले मुख्यमन्त्रीलाई दिएको समर्थन फिर्ता लिएका थिए । एमाले र माओवादीले आफूहरुले समर्थन फिर्ता लिएका कारण मुख्यमन्त्रीले २५ वैशाखसम्म प्रदेशसभामा विश्वासको मत लिनुपर्ने मत राख्दै आएका थिए । र प्रदेशसभामा मुख्यमन्त्रीले विश्वासको मत लिनुपर्ने र नलिए २५ वैशाखपछि पदमुक्त हुने व्यहोराको संकल्प प्रस्ताव प्रदेशसभामा पेश गरेका थिए । उक्त संकल्प प्रस्ताव प्रदेशसभाले पारित पनि गरेको थियो ।

मुख्यमन्त्री कार्कीले भने संविधानको धारा १६८ (५) बमोजिमको मुख्यमन्त्रीले विश्वासको मत लिनुनपर्ने अडान राख्दै आएका थिए ।

बुधबार नेकपा एमाले र नेकपा माओवादी केन्द्रले मुख्यमन्त्रीले विश्वासको मत नलिई ३० दिन गुजारेकाले सरकार रिक्तताको अवस्था रहेको भन्दै नयाँ सरकार गठन आह्वान गर्न माग गरेका थिए ।

प्रदेश प्रमुख खापुङले यस विषयमा महान्यायाधिवक्ता कार्यालयसँग राय पनि माग गरेका थिए । महान्यायाधिवक्ताको कार्यालयले राय पठाएपछि राति ११ बजे नयाँ सरकार गठन आह्वान गरिएको हो ।

सरकार गठनको आह्वान भएपछि एमाले र माओवादी केन्द्रका ५२ सांसदको समर्थनमा भोलि नै एमाले संसदीय दलका नेता हिक्कमतकुमार कार्कीले दाबी पेश गर्ने तयारी गरेका छन् । भोलि दाबी पेश गर्ने तयारी भएको माओवादी केन्द्र संसदीय दलका नेता इन्द्रबहादुर आङ्बोले जानकारी दिए ।

९३ सदस्यीय प्रदेशसभामा बहुमतका लागि ४७ मत चाहिन्छ । एमालेसँग ४० र माओवादी केन्द्रसँग १३ सांसद गरी ५३ जना सांसद रहेकाले सरकार निर्माणका लागि दुई दलसँग बहुमत छ ।

सरकार गठनको आह्वानका विरुद्ध मुख्यमन्त्री केदार कार्की भने सर्वाेच्च अदालत जाने तयारीमा छन् । उनी सर्वाेच्च जानुअघि नै मुख्यमन्त्रीमा हिक्मतकुमार कार्कीलाई नियुक्त गर्ने तयारी छ ।

असंवैधानिक काम भयो : मुख्यमन्त्री कार्की

मुख्यमन्त्री केदार कार्कीले प्रदेश प्रमुख पर्शुराम खापुङले असंवैधानिक कदम चालेको बताएका छन् । एउटा सरकार हुँदाहुँदै प्रदेश प्रमुखले अर्काे सरकार गठनको आह्वान गरेर असंवैधानिक कदम चालेको बताएका हुन् । उनले भने ‘संविधानले दुई वटा सरकारको परिकल्पना गरेको छैन ।’

मुख्यमन्त्री कार्कीले आफू बहाल रहेकै अवस्थामा नयाँ सरकार गठनको आह्वान गर्नु असंवैधानिक भएको दबी गरे । ‘ यो असंवैधानिक कदम भयो’, मुख्यमन्त्री कार्कीले भने । उनले प्रदेश प्रमुखको कदम विरुद्ध बिहीबार सर्वाेच्च अदालतमा रिट दिने तयारी गरेका छन् ।